Solelhada

Plein Soleil. Film de René Clément. En francés. Film deis annadas seissanta. Aprofiecha dempuei le festenau de Cana 2013 d'una polida restauracion de l'imatge. Alan Delon pausa coma un manequin de mòda a cada plan. Fa pensar au personatge principau de la seria Mad Men. Pecaira, la realizacion freja e escolara oblida la sensualitat de l'ensems. Aquela sensualitat qu'avèm dins lo remirable La Piscine de Jacques Deray ambé lo meme actor principau capita pas de ponchejar maugrat la mar e la beutat dei paisatges italians en cartas postalas. Propret, siam luenh de l'univers cinic dau roman de Patricia Highsmith qu'inspirèt lo film. Pasmens l'ambient de l'epòca, la jovença deis actors e actritz polits coma de dieus gregaus son un monument de classicisme francés qu'explica lo seriós, l'aplicacion d'una òbra, facha per lo respècte d'un public que se desplaçava per veire jogar seis idòlas: Maria Laforêt, Maurice René e l'icòna Alan Delon. De veire per cabussar dins un periòde de l'istòria dau cinèma franchimand e comprene son influéncia plastica sus l'atmosfèr ye-ye. E l'istòria policiera es traç que ben menada. Finala: l'aconselhe.

 De veire en vod aquesta passa, dins lei cinèmas d'art e d'assag, e sus lei plateformas de telecargament leiau.

Elefante Blanco

Film de 2013 realizat per Pablo Tropero. En castilhan. Cònta lo bidonvila de la Viergi a Buenos Aires. Onte sola la religion pòu jogar un ròtle sociau per sauvar lei gents de la pauretat, de la misèria, de la dròga. Lo govèrn estènt represiu per leis estajants. La realizacion un pauc telefilm, sota la faussa fòrma d'un reportatge, camèra a l'espatla a tendéncia de perdre sei personatges per faire passar son messatge. La scèna d'amor d'una non-cresenta ambé lo jove curat (en crisi) arriba pas d'escandalizar. Tot dau lòng Jeremi Renier a de mau de mestrejar son jòc dins la lenga qu'es pas sieuna. Demòra pasmens un polit document sus lo subjècte. E ansin l'òbra garda son objectiu  educatiu e informatiu. De veire en Vod ò sus lei plataformas de telecargament leiau.

Una fotografia d'Aurélien Vieilledent